धनगढी /गृहमन्त्री ओमप्रकाश अर्यालले आगामी निर्वाचन तोकिएकै मितिमा निष्पक्ष रूपमा सम्पन्न हुने स्पष्ट गरे । धनगढीमा मङ्गलबार आयोजित सुदूरपश्चिम प्रदेशस्तरीय सुरक्षा गोष्ठीमा बोल्दै उनले फागुन २१ गते हुने भनिएको निर्वाचन कुनै हालतमा नसरिने दाबी गरे।
उनका अनुसार सरकारको प्रमुख दायित्व शान्ति–सुरक्षा कायम गर्दै सुशासन सुनिश्चित गर्नु र समयमै निर्वाचन सम्पन्न गर्नु हो। “सरकारलाई जनताले दिएको म्यान्डेट भनेकै निर्वाचन गर्नु हो,” मन्त्री अर्यालले भने, “चुनाव निष्पक्ष, भयरहित र शान्तिपूर्ण वातावरणमै तोकिएको समयमा सम्पन्न हुन्छ।”
उनले राजनीतिक शक्ति, निर्वाचन तयारी र सुरक्षा व्यवस्था प्रभावकारी बनाउन सबै राज्य संयन्त्र सक्रिय रहेको जानकारी दिए। राजनीतिक दलहरूलाई निर्वाध रूपमा चुनावी क्रियाकलाप गर्न सकिने वातावरण मिलाइएको उनको भनाइ थियो।
“सरकार सबैको साझा हो। कसैप्रति विभेद गरिँदैन,” मन्त्री अर्यालले थपे, “कुनै दलको चुनावी गतिविधिमा बाधा नआओस् भन्न प्रदेशदेखि स्थानीय तहसम्म सबै संयन्त्र परिचालनमा छन्।”
सुरक्षा मूल्यांकनका आधारमा आवश्यक निर्णायक कदम चाल्न सरकार तयार रहेको पनि गृहमन्त्रीले बताए।
